Kralendijk – Pa e desaroyo duradero di antiguo plantashi Bolivia, Bonaire Properties N.V., propietario di e tereno, a kontratá e renombrá Ontwerp Bureau KuiperCompagnons. E kompania aki tin mas ku 100 aña di eksperensia den desaroyamentu di planifikashon urbano i di paisahe na Hulanda i tambe den èksterior.
Durabilidad
KuiperCompagnons ta goza mundialmente di un gran reputashon i a partisipá den hopi proyekto prestigioso (https://www.kuipercompagnons.nl/nl/projecten/).
Segun Wouter Vos, arkitekto pa proyektonan di paisahe i direktor internashonal di Kuiper Compagnons, e instrukshon pa desaroyá un futuro duradero pa Landgoed Bolivia ta kuadra eksaktamente pa loke e kompania ta para pé. Ku e proyekto aki Kuiper Compagnons ta kontribuí ku nan èkspertisio i konosementu na planifikashon di e komunidat Boneriano.
Banda ku e kompania ta mira e posibilidat pa restablesé e paisahe di e tereno balioso aki, e plan lo kontribuí tambe na un mihó balansa riba e merkado di bibienda ku konstrukshon di un kantidat di kas pagabel. Den e plan pa desaroyá Landgoed Bolivia tin inkluí agrikultura i hortikultura pa fortalesé e outarkia Boneriano. Esaki lo perkurá pa empleo i tambe evitá mas eroshon i baimentu di sedimentu riba e koralnan na kosta di Landgoed Bolivia.
Tèrser zona
Kordinashon di desaroyo di Landgoed Bolivia ta den man di Metafoor Ruimtelijke Ontwikkeling, kende ta duna servisio na diferente munisipio na Hulanda riba tereno di entre otro procesmanagement i desaroyo planeá di áreanan munisipal.
Segun Erik Berkelmans, direktor di Metafoor, e kalidat di habitat ta bou di preshon komo ku e poblashon di Boneiru ta kresiendo rápidamente. Ku e oportunidat pa desaroyá Landgoed Bolivia den un parke rural por evitá ku e urbanisashon di Kralendijk ta sigui yena té bóta. Paden i pafó di Kralendijk na Playa por nota kon akumulashon di edifisio, kaya i lugá di stashoná ta kongestioná di remate. Si kier deskargá Kralendijk strukturalmente i duna Rincon un perspektiva pa futuro e desaroyo di un tèrser zona urbániko ta nesesario. Tumando tur e opshonnan ku ta tin den konsiderashon, Bolivia ta un solushon duradero pa Boneiru ta bon prepará pa futuro.
Rekuperashon di naturalesa
For di punto di bista di planifikashon general, desaroyamentu di e antiguo plantashi Bolivia ta un tremendo oportunidat. E teritorio, ku tin un balor kultural históriko, ta kore peliger di bai perdí. Ku un enfoke integral desaroyo di un parke rural lo resultá na benefisio di medio ambiente, bibienda i empleo. Den e parke lo bin cluster di kas ku lo wòrdu konstruí den fase té aña 2045. Konstrukshon di e kasnan aki lo kubri solamente 3 porshentu di e superfisio total di Landgoed Bolivia. E clusternan aki lo tin un grado haltu di outárkia.
Komo ku e konstrukshonnan lo wòrdu integrá den e paisahe, e área lo mantené su karakter. Kasi 85% di e tereno lo keda habrí i intakto. Pa promové rekuperashon di flora i fauna lo bai hiba un maneho sentral. Ya for di e promé fase e parkmanagement ta segurá maneho i mantenshon di e área úniko aki.
Akuerdo
Dia 26 di yanüari 2022 Kolegio Ehekutivo di Boneiru i Bonaire Properties N.V a firma un akuerdo preliminario di e proyekto. Denter di poko lo presentá e plannan na Konseho Insular di Boneiru.
